Работната група на опозицијата денеска треба до владината работна група да ги поднесе своите амандмани на Предлог законот за јавно обвинителство со кој се решава и статусот на Специјалното јавното обвинителство.
Тони Менкиновски, кој ја предводи групата на ВМРО-ДПМНЕ, вели дека имаат забелешки на 120 страници, но оти има простор за договор.
Владиниот портпарол Миле Бошњаковски, вчера на прес-конференција потврди дека ВМРО-ДПМНЕ денеска треба да ги достави предлозите во врска со законот за Специјалното јавно обвинителство и дека за утре е закажана нова средба на која ќе се разговара за разликите по ова прашање меѓу Владата и опозицијата. Тој нагласи дека постојат серизони разлики меѓу Владата и ВМРО-ДПМНЕ, кое бара СЈО да биде посебно одделение.
– Дефинитивно за нас како Влада Предлог-законот е најсоодветно решение и сметаме дека треба да се имплементира без одоговлекување – нагласи Бошњаковски.
Во пресрет на утрешната средба на работните групи на власта и на опозцијата премиерот Зоран Заев во интервју за МИА изјави дека се подготвени за разговори за секое прашање кое е аргументирано со опозицијата, но тоа да не биде на штета на државата и на институциите на системот. Се надева дека законот за јавното обвинителство ќе биде донесен навреме, пред извештајот на ЕК за земјава и очекуваната одлука за почеток на приспапните преговори
– Драго ми е што почнаа разговорите, знам дека до крајот на оваа недела веќе ќе има конкретни писмени материјали околу некои предлози, верувам дека е возможно навремено да го донесеме законот за јавно обвинителство, во кое што е инкорпорирано СЈО како создаден капацитет. Уште еднаш напоменувам, тоа јавно обвинителство веќе, како што е поставено и во новиот закон, ќе ја гони власта, сегашната власт. Тоа јавно обвинителство е капацитет кон кој ќе тежнеат и другите обвинителства, и материјален и финансиски и со опрема. Да дадеме шанса на еден ваков закон, и сите сме тука во државата со доверба кон институциите, да продолжиме да ги градиме реформите – изјави Заев.
Прашан дали е подготвен да прифати смена на Катица Јанева, Заве вели „апсолутно не, бидејќи со тоа би се испратила лоша порака до оние кои „опстоиле, пркоселе, верувајќи во државата, во системот, во Уставот и законите, во тешко време“.
– Тоа е за мене институционално прашање, од причина што навистина Катица Јанева и нејзиниот тим на обвинители, истражители и сите што работат беа во едно многу тешко време трошката надеж на враќање на правната држава, која ете почна да се враќа во нашата земја. Јас сум убеден дека не смееме да испраќаме лоши пораки до оние кои што опстоиле, пркоселе, верувајќи во државата, во системот, во уставот и законите, во тешко време. Треба да ги поддржиме нивните капацитети. Јас ги слушам и критиките од опозицијата, и не дека немам разбирање за нив, но предностите на вака создадена институција, со овие луѓе е навистина голема предност за Северна Македонија – вели Заев.
На првата средба во понеделникот не беше постигнат договор околу предлог-законот за Јавното обвинителство. Министерката за правда Рената Дескоска, која ја предводи работната група на власта, по средбата рече дека за нив е неприфатливо барањето СЈО да биде дел од Обвинителството за организиран криминал, ниту прекинувањето на истрагите и обвиненијата.
Друга клучна разлика е разликата околу судбинатата на истраги кои се во тек од страна на СЈО, предистражни постапки и обвиненија што се покренати по 18 месеци од предавањето на материјалите.
Според Дескоска, барање за прекинување на овие постапки и потоа нивно, ако треба, одново отпочнување, значи на некој начин губење на голем број докази што би биле сериозни докази во постапки. Со тоа има опасност од неуспешно завршување на многу постапки, а со тоа и амнестирање.
За опозицијата, пак, неприфатливо е СЈО да не одговара пред никого и само да создава буџет, кој никој од надвор нема да го контролира. Претставник на опозициската ВМРО-ДПМНЕ, Менкиноски рече дека тие се залагаат СЈО да биде одделение во Јавното обвинителство за организиран криминал.
– Овој закон навистина има потреба од амандмани за подобрување на работата на јавното обвинителство. ВМРО-ДПМНЕ стои на располагање. Сметаме дека СЈО треба да биде одделение во јавното обвинителство за организиран криминал. Не се прифатливи одредбите СЈО да не одговара пред никого и сам да си го создава буџетот – рече Менкиноски.
Владејачкото мнозинство очекува законот за јавното обвинителство да биде донесен до крајот на март, односно пред почетокот на кампањата за претседатеските избори. Тоа е и еден од условите за отворање на преговорите со ЕУ во јуни.
