Градот Скопје и јавното претпријатија „Улици и патишта“ редовно работат на обновување на постојната и поставување нова хоризонтална и вертикална сообраќајна сигнализација на булеварите и на улиците во наша надлежност, реагира Градот на текстот „Сите пешачки премини во Скопје избришани! (ФОТО)“, објавен во Плусинфо.
Од таму велат дека насловот на текстот и неговата содржина не кореспондираат со состојбите на терен и прикажуваат нереална состојба.
– Од аспект на бележење на хоризонталната сигнализација на градските сообраќајници, сакаме да ја информираме јавноста дека активностите почнаа на 1 мај и заклучно со 31 август обележани се вкупно 153 раскрсници со пешачки премини, 50 автобуски стојалишта, коловозите пред училиштата, како и сите велосипедски патеки. Во рамките на овие активности рачно е обележана вкупна површина од 18.295 квадратни метри, додека машински е обележана површина од 24.462 квадратни метри – велат од градот.
Како новитет во работата на јавното претпријатие, во насока на намалување на сообраќајниот метеж и потешкотии, е извршување на овие активности во вечерните часови, поточно ноќно бележење на улиците.
Градот Скопје и јавното претпријатија „Улици и патишта“ ќе продолжат со своите напори за подобрување на означеноста на градските сообраќајници и зголемување на безбедноста во сообраќајот на сите негови учесници.
