Скопското обвинителство отвори истрага за дадилката која е осомничена дека малтретирала две близначиња на возраст од три години.
Мајката на дечињата ја пријави дадилката во полиција пред два дена, по што таа беше приведена во станица, а денеска од ОЈО Скопје соопштија дека отвораат истрага и бараат притвор поради опасност од бегство, повторување на делото и влијание врз сведоците.
„Во временскиот период од 1 до 27 ноември, осомничената ангажирана за негување и чување на две деца на возраст од три години, грубо ја запоставувала својата должност за грижа и воспитување и ги малтретирала. Имено, таа постојано им викала и ги навредувала без причина, но и физички ги напаѓала со удари по главата и кубење на косата. Мајката на децата во домот поставила безбедносни камери и при прегледот на видео записот го забележала малтретирањето и однесувањето кон децата, по што поднела кривична пријава“, наведуваат од обвинителството.
Ова е втора дадилка за краток период која завршува во притвор и е под истрага откако претходно безбедносните камери открија уште една како малтретира дете во скопски Аеродром. И таа дадилка се наоѓа во притвор.
