Основното јавно обвинителство за гонење на организиран криминал и корупција поднесе обвинителен акт против седум македонски државјани за делото учество во странска војска, паравоени или параполициски формации. На еден му се става на товар и делото терористичка организација.
Петмина од обвинетите се дел од истражни постапки во рамките на претходни акции познати во јавноста како „Ќелија 1“ (август 2015) и „Ќелија 2“ (јули 2016), но беа недостапни на органите на прогонот и за нив беа активни национални и меѓународни потерници.
– Обвинетите како странски терористички борци активно учествувале во војните во Сирија и Ирак. Со намера да станат учесници во паравоените формации ја напуштале територијата на Република Македонија и заминувале за Сирија каде се обучувале и учествувале како борци на ИСИС. Освен што учествувале во паравоените формации надвор од Република Македонија, обвинетите обезбедувале, собирале финансиски и материјални средства за лица кои учествуваат во овие формации, користејќи ги социјалните мрежи и друг вид на комуникација повикувале, врбувале и поттикнувале други лица да учествуваат во паравоени формации надвор од Република Македонија. Обвинетиот на кој му се ставаат на товар две кривични дела – Учество во странска војска, паравоени или параполициски формации и Терористичка организација бил припадник и на терористичката организација „Исламска држава“ – наведуваат од обвинителството.
Обвинетите во август годинава беа предадени на македонските органи на прогонот откако беа уапсени во соработка со партнерите од Глобалната коалиција за борба против тероризмот и Сириските Демократски Сили.
