Хотелите во Охрид и во Струга ги преполовија цените за ноќевање во викендот за верскиот празник Богојавление – Водици за домашните туристи. Цената за ноќевање со појадок во хотелите кои се членки на Зружението на хотелиери (ХОТАМ) е 15 евра по човек и важи за периодот од 16 до 20 јануари.
– Намалувањето на цената на хотелското сместување на овој верски празник е веќе традиција бидејќи неколку години со ред донесуваме ваква одлука. Првата година ја намаливме цената на 20 евра по човек, па потоа на 18 евра и за годинава се договоривме да ја намалиме на 15 евра за ноќевање по човек. Оваа цена за празничниот викенд ја прифатија сите членки на ХОТАМ од Охрид и Сруга. При букирање на соба само треба да се праша дали хотелот е членка на ХОТАМ и да се посочи на попустот – вели претседателот на Здружението, Крсте Блажевски.
Одлуката на ХОТАМ е донесена на иницијатива на општина Охрид која е прифатена од сите членки на охридското крајбрежје.
Хотелиерите очекуваат зголемен број на гости од земјава и странство поради празникот и интересната програма, за што ќе придонесе и зимскиот одмор на учениците.
Нешто пониски цени од вообичаените викенди имаат и охридските хотели кои не се членки на ХОТАМ.
Општината Охрид независно од верското чествување на Богојавление, организира богата празничната програма. Во нејзини рамки е и големиот конценрт на балканската музичка ѕвезда Петар Грашо кој ќе се одржи во пресрет на Водици на 18 јануари.
Чествувањата и обичаите поврзани со Водици во Охрид, продолжуваат и на 20-ти јануари со Денот на рибарите, односно прославувањето на празникот Свети Јован Крстител.
Уникатната манифестација со традиционалното капење на рибарите и годинава ќе биде надополнета со повеќе културни и забавни содржини и концерт на македонската фолк ѕвезда Миле Кузманоски. И оваа година се организира подготовка на рибна чорба во голем казан, која ќе биде послужена на сите гости. Оваа манифестацијата ќе се одржи напладне на Градскиот плоштад.
