Новиот асфалт на улицата Антон Попов има поголем квалитет, долготрајност и издржливост, велат од Одделението за односи со јавноста и информации за граѓаните на Град Скопје.
– На оваа улица е нанесен слој на асфалт „сплит мастик“ кој се користи на повеќето градски сообраќајници изминативе неколку години. Тој е со поголеми гранули и истиот нуди поголем квалитет, долготрајност и издржливост. Сите сообраќајници кои ги гради Градот Скопје се вршат согласно сите европски стандарди. Дополнително, секој градежен објект има стручен надзор кој го контролира изведувањето на градежните работи и го тестира асфалтот кој се користи во истите – велат оттаму за Плусинфо.
Град Скопје изминатиов период изврши реконструкција на коловозот на улицата Антон Попов, на потег од крстосницата со улиците Јордан Мијалков и Павел Шатев, до крстосницата со улицата Димо Хаџи Димов, во вкупна должина од 584 метри.
– На оваа делница е поставен нов асфалт, а извршено е и нивелирање на 37 постојни шахти и сливници. За реализација на овој капитален проект од буџетот на Град Скопје се издвоени 5,5 милиони денари – рекоа од Градот.
Бидејќи има шахти кои не се рамни со асфалтот, прашавме дали се работи на овој проблем, затоа што граѓаните би можеле да си ги уништат возилата.
– Во моментов се работи на доизработка на овие шахти и очекуваме целосно да заврши нивната корекција во текот на наредниве неколку денови – одговорија од Град Скопје.
