Рокот од пет дена за поднесување барање за амнестија за настаните поврзани со 27 април, истекува утре.
Според најавите, денеска барање за амнестија треба да поднесат пратеникот Сашо Василевски и Александар Василевски Нинџа. Очекувањата се дека барања во текот на денешниот и утрешниот ден ќе поднесат најголем дел од обвинетите.
Досега, познато е само дека амнестија поднеле четворица, меѓу кои и пратеникот Крсто Мукоски. Останатите тројца се Никола Митревски Кољо, Младен Додевски и Оливер Радулов.
Судот има рок од пет дена од приемот на барањето да донесе решение дали ќе некого го следува амнестија или не, а за тоа претходно потребно е да прибави и мислење од јавен обвинител.
Дека нема да бараат амнестија, пак, се изјаснија Игор Југ и Јане Ченто. Тие пред судот посочија дека се против селективна амнестија и оти сакаат судот, а не политичките елити, да им судат.
