Сточарството изминативе години беше запоставено и затоа овој период сме насочени кон креирање на нови мерки и политики за развој на оваа земјоделска гранка – порача на денешната средба со сточарите во Берово, министерот за земјоделство, шумарство и водостопанство, Љупчо Николовски.
Министерот Николовски ги образложи актуелните состојби во сточарството, како и мерките на МЗШВ за поддршка на овој сектор. Тој најави дека в година со Програмата за рурален развој 2019 година, се планира зголемување на сумата за мерката 121 „Набавка на приплоден добиток“ , од постоечките 14 милиони денари на 60 милиони денари или околу еден милион евра. Дополнително, ќе се работи на промени во Правилникот за оваа мерка да биде подостапна за сточарите .
– Оваа мерка ќе придонесе за обновување на генетскиот потенцијал на сточниот фонд, што ќе влијае врз зголемување на продуктивноста на сточарското производство и на севкупниот развој на оваа гранка. Падот на бројките во сточарството мора да го сопреме и потоа заеднички да со вас сточарите да работиме на соодветни мерки за развој на оваа гранка. Сметам дека е еден од најважните сектори во земјоделството и затоа во следниот период силно ќе се фокусираме на нови мерки и политики. За прв пат објавивме наменски оглас за државно земјоделско земјиште под закуп до 3 и над 3 хектари за сточари за производство на добиточна храна, за в година се планирани 600 илјади евра за колектори за струја на бачилата со овци, а паралелно работиме и на други мерки, како што е новиот Законот за пасишта, измени на Законот за државно земјиште и други – истакна министерот Николовски.
Со новиот закон по речиси 20 години, како што информираат од МЗШВ, ќе се уреди постапката и користењето на пасиштата во државна сопственост како добро од општ интерес, на современ и транспарентен начин. Со законските решенија е предвидено да се воспостават евиденција на државните пасишта и Регистар на пасиштата, како и да се пропишат одредби за класификација на пасиштата, согласно со нивната намена.
Во годинешната Програма за директни плаќања за 10 отсто е зголемена субвенција по грло за сточарите со развоен потенцијал. Се воведоа и нови мерки во сточарството, како што се дополнителни директни плаќања за уматичен грло-маторица, со цел подобрување на генетскиот потeнцијал и зголемување на производството на свињите, и дополнителни директни плаќања од 30 проценти за зголемен пријавен број на грла во основно стадо, несилки и пчелни семејства, соопштија од Министерството.
На средбата во Берово присуствуваа и директорот за стопанисување со пасишта, Љуљзим Фејзулаи, и директорот на Агенцијата за финансиска поддршка во земјоделството и руралниот развој, Николче Бабовски.
