ВМРО-ДПМНЕ не предложи ново лице за министерското столче во Министерството за труд и социјална политика до распуштањето на Собранието. Дека нема да има замена на техничката министерка Рашела Мизрахи, синоќа потврди и лидерот на ВМРО-ДПМНЕ Христијан Мицкоски.
Тој рече дека Мизрахи била разрешена бидејќи го открила протизаконското работење на нејзината претходничка Мила Царовска.
– Тоа беше една процедура во која слугата на Заев, Оливер Спасовски, на начин на кој ги прекрши сите закони и политички договори, се обиде да го затскрие моментот кога јавноста, а и пратениците слушаа како всушност Зоран Заев го советувал Бојан Јовановски, како објаснува дека знаел за делувањето на Меѓународниот сојуз и ја помагал работата на телевизијата. Сето тоа се обиде да го сокрие со смената на најдобриот министер во Владата Рашела Мизрахи. Ние тој чин не го признаваме и немаме намера да бидеме дел од оваа игра на која основен сценарист е Зоран Заев, а извршител Сапсовски – рече Мицковски.
Мизрахи беше разрешена од Собранието, по барање на премиерот Оливер Спасовски бидејќи не го почитувала уставот.
Спасовски и вчера кога се одржуваше последната седница на Собранието упати јавен апел до опозицијата да предложи наследник за Мизрахи.
Заменик-министерка Санела Шкријељ ќе го води МТСП до изборите, а до формирање на нова Влада со ресорот ќе раководи заменик-министерот Ѓонул Бајрактар.
