Обвинителството денеска не го почитуваше Законот за амнестија кој беше дел од процесот за помирување, реагира Независната пратеничка група на ВМРО-ДПМНЕ, во чии редови се и тројцата пратеници кои амнестирани за 27 април, Љубен Арнаудов, Крсто Мукоски и Сашо Василевски.
„Со жалење констатираме дека, денес Јавното обвинителство во текот на завршното обраќање не ги испочитува одредбите од член 1 од Законот за амнестија, каде многу прецизно е дефинирано за какви дела треба да продолжи судскиот процес. Од таа причина сакаме да истакнеме дека почитувањето и спроведувањето на законот е императив за владеење на правото. Затоа апелираме до судот доследно да ги испочитува одредбите од Законот за амнестија, со оглед на доказите кои беа изведени во текот на судскиот процес“, пишува во реакцијата на независната пратеничка група од ВМРО-ДПМНЕ.
