Повеќе од три часа жителите на скопската населба Волково се оставени без електрична енергија. Како што ни пишуваат читатели на Плусинфо, овој проблем таму се повторува веќе подолго време, а посочуваат дека и минатата ноќ останале без струја, а со тоа и без греење.
– Немањето електрична енергија станува редовна пракса за нас. Скоро секој ден се соочуваме со прекини, а претходната ноќ немаше струја повеќе од 12 часа. Еве и сега, во моментов, струја нема повеќе од три часа. Како да готвиме? Како да се грееме? Бадијала ли купувавме инвертер клими? – вели револтиран читател за Плусинфо.
Од ЕВН велат дека станува збор за дефект на далновод и дека екипите работат на проблемот. Оттаму не знаеја да ни кажат уште колку време ќе трае мракот во Волково.
