Македонскиот дипломатски синдикат упатува најостра критика до раководството на Министерството за надворешни работи за спроведената изборна постапка за упатување дипломати на работа во дипломатско-конзуларни претставништва, соопшти синдикатот.
– И покрај бројните укажувања на Синдикатот за воспоставување пракса ваквите упатувања да се вршат во соодветен период, вчера, на само една недела пред формирањето на техничката Влада, беше извршен избор на 18 дипломати и двајца административци. Покрај сомневања дека упатувања во предизборен период се лесно подложни на политизација, Синдикатот е на мислење дека ваквата постапка е крајно непринципиелна, имајќи предвид дека пред само две години, во слична ситуација, со обратно поставени улоги, беше стопирано упатувањето во странство на веќе избрани дваесетина дипломати, велат од МДС.
Тие апелираат да престане праксата на двојни аршини и да се воспостават постојани правила на игра, без оглед на актуелната политичка коњуктура.
МДС укажуваме дека трите процеси што упорно се туркаат во предизборниот период во МНР – донесување нов Закон за надворешни работи, упатување дипломати и упатување амбасадори – треба да запрат и да продолжат по парламентарните избори.
