Претседателот на ВМРО-ДПМНЕ, Христијан Мицкоски имал работен појадок со високата претставничка на ЕУ за надворешна политика и безбедност, Федерика Могерини.
На средбата се разговаралло за европските интеграции на државата, најновиот извештај на Европската комисија и нотираните недостатоци.
Мицкоски истакналл дека Европската Унија и е потребна на Република Македонија како начин за подигнување на стандард на граѓаните, повисок квалитет на живеење и споделување на заедничките вредности.
„На тој план ВМРО-ДПМНЕ даде свој придонес давајќи суштински забелешки кои беа инкорпорирани во реформските закони кои беа донесени, со што партијата се водеше од државните интереси и интересите на граѓаните кои за ВМРО-ДПМНЕ се на прво место“, се вели во информацијата од партијата.
Претседателот на ВМРО-ДПМНЕ, Мицкоски изразил загриженост за економската стагнација во државата, корупцијата која е широко распространета и случаите кои отвараат сериозен сомнеж за криминал во кој се вмешани највисоки преставници на власта.
„Политичкиот терор е широко застапен, и тој се одвива на повеќе нивоа како начин на пресметка на власта со неистомислениците, притисоците врз медиумите и недостатокот на демократски амбиент е сериозен предизвик кој државата ја уназадуваат во повеќе сфери“, истакнал Мицкоски.
Мицкоски посочил дека Република Македонија мора да го продолжи патот кон Европската Унија, се до нејзино целосно интегрирање, а за тоа е клучна и поддршката од пријателите од Европската Унија кои мора одблиску да ги мониторираат процесите и волјата на владата да работи на надминување на нотираните забелешки во Извештајот на ЕК.
