Пратеничката група на ВМРО-ДПМНЕ и коалицијата „За обнова на Македонија“, денес од Собранието поднесе иницијатива до владата, со барање во најскоро можно време до Парламентот да го достави Законот за ратификација на Северно-атланскиот договор и на Пристапниот протокол за членството на Грција и Турција во Северно-атланската Алијанса (НАТО), рече Никола Мицевски, координатор на пратеничката група на ВМРО-ДПМНЕ.
Согласно Уставот и Деловникот на Собранието, владата е таа која поднесува предлог закони за ратификација до законодавниот дом.
– Нашата иницијатива има за цел да го забрза и да го обезбеди ратификувањето на Северноатланскиот договор и Пристапниот протокол за членство во НАТО од страна на Собранието, пред истото да се распушти заради одржување на предвремените парламентари избори, кои треба да се одржат на 12-ти април 2020 година.
Сакаме да ја информираме јавноста дека ваквата постапка е пракса која што во Северно-атланската Алијанса е воведена при зачленувањето на Црна Гора во НАТО. Тогаш во април 2017 година, Парламентот во Подгорица предвремено ги ратификуваше овие документи, а ратификацијата на протоколот за пристапување на Црна гора во НАТО од страна на Холандија и Шпанија се случи еден месец подоцна во мај 2017 година – рече Мицевски.
Тој апелира претседателот на Собранието Талат Џафери иницијатива во најбрзо време да ја испрати до владата, за да како што вели, СДСМ не ги одложи изборите.
