Важно е здружено да се спротивставиме на надворешни влијанија на Русија во сите овие земји, порача премиерката на Велика Британија Тереза Меј за влијанието на Русија во регионот и додаде дека тоа им е познато, спомнувајќи го и случајот во Солзбери.
– Ние препознавме и ја видовме Русија како се однесува кон Западен Балкан и во цела Европа. Дел од тоа се однесува на една пропаганда, на злоупотребата на информации, кибер напади. Со Заев се осврнавме и на реалниот напад со употреба на нервен гас во Велика Британија. Важно е сите да се здружиме во справувањето и спротивставувањето на овие надворешни влијанија на Русија во сите овие земји. Затоа поддршката што ја добивме од Македонија и од други земји беше од големо значење за нас. Сакаме да обезбедиме дека низ цела Европа ќе можеме да се здружиме и да работиме заедно за да ги браниме вредностите кои се темелот на нашите демократии, рече Меј.
