Градоначалникот на Струга Рамиз Мерко повторно ја доби довербата од интегративците и вчера е избран за прв човек на струшкиот огранок на ДУИ. Контроверзниот Мерко третпат застанува на чело на струшкиот огранок и е единствен од старите кадри кој при внатрепартиските избори на ДУИ ја задржа функцијата претседател на огранокот.
ДУИ успеа да ги смени Беќир Асани и Невзат Бејта од први луѓе на чаирскиот и на гостиварскиот огранок, но Мерко се чини е незаменлив.
Од партијата брифираат дека би го смениле и Мерком, но оти на изборното собрание ниту еден сопартиец не се пријавил да му конкурира на струшкиот градоначалник за претседателската функција во огранокот.
Дури и противниците се согласиле на реизбор на Мерко, со коментари дека е ризично да го сменат на само пет месеци пред предвремените парламентарни избори.
Мерко често ја бранува јавноста со својте контроверзни ставови. Така струшкиот градоначалник присуствуваше на отворањето на пицеријата-дивоградба на сопартиецот Нефи Усеини кај чинарот во Охрид. Мерко си купи луксузно „ауди“ од 67.000 евра иако Општината е во долгови. Градоначалникот упорно тврди и дека во Струга нема дивоградби и покрај истечените концесии на струшките плажи и рестораните од тврда градба.
Мерко во три мандати е и градоначалник на Струга. Тој локалните избори ги изгуби само од Зијадин Села, но затоа на последните локални избори повторно застана на чело на Струга.
