Министерството за внатрешни работи (МВР) му честита на ракометниот клуб „Вардар“ за освојувањето на титулата европски шампион. Притоа, укажува дека радувањето на спортските успеси е неспоиво со говор на омраза, дискриминација и поттикнување на омраза и насилство.
МВР соопшти дека ќе ги преземе сите неопходни мерки за обезбедување на јавниот ред и мир на пречекот на нашите европски шампиони и ќе биде најстрого санкциониран било каков обид за предизвикување инцидент, како што тоа беше направено на синоќешната прослава.
– Апелираме до граѓаните да не употребуваат навредливи пароли, скандирања или пеење на песни со кои шират говор на омраза, затоа што тоа ќе биде санкционирано. Апелираме до граѓаните да се воздржат од употреба на пиротехнички средства затоа што на тој начин се загрозува безбедноста на граѓаните, како што тоа беше случај синоќа со една девојка што се здоби со повреди од пиротехничко средство – велат од МВР.
Граѓаните кои ќе забележат било какво прекршување на законите треба да пријават кај полициски службеник или во најблиската полициска станица или да се јават на бројот 192. Секторот за компјутерски криминал и дигитална форензика во координација со надлежното обвинителство континуирано презема мерки и активности за санкционирање на ширењето на говорот на омраза и на социјалните мрежи, најчесто на Фејсбук.
МВР ги повикува граѓаните достоинствено да ги пречека хероите од Келн и заеднички го прославиме овој историски успех.
