Поранешниот менаџер на изборната кампања на американскиот претседател Доналд Трамп, Пол Манафорт, лажел за време на сведочења во Федералното истражно биро на САД (ФБИ) и со тоа ги прекршил правилата на нагодбата, поради што му се заканува казна и до 10 години затвор.
Светските медиуми оценуваат дека тоа би можело да ја загрози истрагата на специјалниот обвинител Роберт Малер за можно руско мешање во американските избори во 2016 година, која би требало да заврши наредните месеци.
Поранешниот менаџер на Трамп беше обвинет во август за банкарска измама и криење банкарски сметки. Тој ја призна вината за да избегне обвиненија за перење пари, меѓу другото, но потоа лажел, се наведува во судски документ.
Манафорт (69) изјави дека не се согласува со оценката на Малер дека лажел, стои во истиот документ.
Тимот на Малер и адвокатите на Манафорт се сложиле дека повеќе нема причини за одлагање на изрекувањето на казната, која може да биде и до 10 години затвор.
Малер го обвини Манафорт дека користел 31 странски банкарски налози за да избегне плаќање на даноци во вредност од повеќе милиони долари. Како доказ е понуден луксузниот стил на живот на Манафорт, за кој обвинителите тврдат дека не би бил возможен ако не извршил финансиска измама.
Властите на Манафорт му запленија четири недвижности и средства од повеќе банкарски сметки.
Светските медиуми констатираат дека иако тоа не бил фаталниот удар врз истрагата, исклучувањето на податоците кои Манафорт ги дал во рамките на нагодбата значи дека Малер повеќе нема да може да смета на сведокот со длабоки врски во Русија, а кој до средината на 2016 ја водеше кампањата на Трамп.
Би-Би-Си наведува дека обвинувањата против Манафорт се однесуваат на периодот пред да работи за Трамп.
ФОТО: ЕПА
