Скопската полиција ги откри напаѓачите на двајца јапонски државјани кои завчера биле нападнати на локалниот пат од с.Катланово кон село Брезница.
Се работи за тројца малолетници од Велес на возраст од 15 до 17 години од кои двајца се приведени. Тие истиот ден во Гостивар одзеле патничко возило „Форд мондео“ со гостиварски регистарски таблички, кое што го употребиле неколку часови подоцна во извршувањето на разбојништвото.
СВР Скопје, по целосно документирање на случајот против лицата ќе поднесе соодветни кривични пријави.
Како што МВР претходно ја информираше јавноста, напаѓачите откако ги пресретнале јапонските државјани кои со велосипеди се движеле на локалниот пат од с.Катланово кон с.Брезница, физички ги нападнале, и им одзеле 3.000 евра, патни исправи, кредитни картички и еден мобилен телефон „Ајфон“, притоа нанесувајќи им на оштетените тешки телесни повреди.
