На секоја одлука на судот, што не е по наш „ќеф“, реагираме. Навика ни стана. Се собираме на штрајкови, како да немаме друга работа и со дрва и камења маваме и викаме, дека судиите судат по директива на сегашната Влада. Така е сега по судската пресуда на Груевски со која треба да оди две години во Идризово. Дали сме во право или не сме тоа не е важно. Важно е да се слуша гласот на Партијата!. Мора да се оди и да се негодува. Мора да се спасат„ нашите“, посебно поренешните водачи, иако знаеме дека до гуша се криви!?. Мора да викаме дека судот е крив, а не лидерот!
Со години е така. По секоја одлука на судот иста песна „пеат“ и СДСМ и ВМРО и ДУИ. Сите се исти. Ама баш сите по ист терк ја „бараат“ правдата, особено за големите. Еве така е и деновиве. „Вождот“ е осуден!. Треба да оди во затвор! Челниците на ВМРО-ДПМНЕ, како којзнае колку да им е жал за поранешниот лидер, ги повикаа „најпослушните“ да се соберат пред судот, пред Владата. Не дека ќе го спасат!? Туку мора да кренат врева и да викаат дека оваа Влада не работи како што треба, дека судиите работат под нивна наредба. Демек лидер срамота е да оди во затвор!? А знаат дека не е така. Знаат дека тие истите до вчера викаа дека оној што крадел народни пари мора да поднесе сметка пред судот. Ако судот потврди, било кои и да е, мора да сноси последици, па и да оди во затвор. Послушниците се собираат и викаат, а „оние“ што ги испраќаат ги нема никаде. Тие мудро, како и секогаш, ако успеат ги добиваат аплаузите, а ако не тие пак остануваат со „чисти раце“.
До пред повеќе од една година ги фалеа судиите, а денес ги плукаат. Бараа судиите да имаат ист аршин кон сите, а кога не е по нивно велат дека судиите се корумпирани, дека судските одлуки ги носат по нечија наредба. Дали лидерот Мицковски и оние околу него, ќе ги испратеа „послушниците“ да демонстрираат пред судот, Владата и било каде ако Судот донесеше одлука во затвор да оди некои „помал“ од ВМРО-ДПМНЕ!?. Кој знае? А не се за „фрлање“ ниту оние од СДСМ, ДУИ.
Да таков народ сме. За „големите “ и рацете во оган ги ставаме. За обичните смртници не нема никаде! Така на пример за оној гладен човек кој украл сто ќебапи му беше изречена казна од три години затвор? Зошто никои не се собра пред судот и зошто тогаш никои не рече дека судијата судел по наредба на некои од тогашната Влада!? Да точно така. Зошто? Дали овој сиромав човек направил поголем грев од оние на кои сега им се суди за украдени големи милиони евра народни пари!? Човекот е во затвор. Бараме ист аршин. Но, кога нас треба да ни се суди тој аршин не важи, забораваме на него!.
До кога! До кога ќе ја бараме правдата само по наш „ќеиф“. До кога едно ќе викаме, а друго ќе правиме. Не, не прават вака само челниците на ВМРО-ДПМНЕ. Истото го прават и СДСМ и ДУИ. Никои не сака да ги тргне рацете од судовите, а народецов наш, како и досега и во иднина, ќе оди, ќе трпи, а оние големите само сеир ќе му гледаат!
