Една ланска фотографија, на која се гледаат кавадаречкиот градоначалник Митко Јанчев и Вице Заев, братот на премиерот Заев, деновиве е хит на парапорталите, кои откриваат неверојатни сознанија за „помирување“ и нови „сојузништва“ меѓу македонските политичари, феномен кој наводно се случува во бугарскиот скијачки центар Боровец.
Фотографијата е снимена лани во Банско на случајна средба меѓу Јанчев и Вице Заев
Прозван, градоначалникот Јанчев за „Фокус“ мораше да објасни дека фотката потекнува од лани, од Банско, од случајна средба меѓу него и Заев. Во свој стил, Јанчев опуштено објаснува дека политичките разлики не се причина луѓето меѓусебно да не се дружат.
Збрката настанала од таму што нашите „пулицер-овци“ некако разбрале дека Јанчев е во Боровец и веднаш претпоставиле дека во хотелот „Рила“ се одржува некаков помирувачки самит или нешто слично. А работата е банална.
Деновиве зимскиот центар Боровец е Македонија во мало. Да, тука е и Јанчев. Тука има и познати фаци од ВМРО-ДПМНЕ, но и од СДСМ. Тука има професори, лекари, интелектуалци, многу обични луѓе од Македонија. А непишано правило е во Боровец навечер да се намине во хотелот „Рила“ и во околните кафеани.
Едноставно, луѓето се поздравуваат, се дружат, прават муабети. Градоначалникот Јанчев можеби малку повеќе од другите, затоа што е муабетчија (кавадарчанец, де), а освен тоа и не скија. Ете, тоа е целата, банална вистина околу дружбите во Боровец.
И секако, тоа е и вистината за ширењето на лажните вести во Македонија, поттикнати од центри на политичка (не)моќ, кои мислат дека на таков начин нешто постигнуваат. Освен што се глупираат.
