По повод одбележувањето на јубилејот – 500 години од постоењето на Куманово – потпишан е и договор за збратимување помеѓу Куманово и Нови Сад, објави Општина Куманово.
Договорот, чијашто цел е соработка во различни сфери од општествениот живот меѓу двете општини во Македонија и Србија, го потпишаа градоначалникот на Општина Куманово, Максим Димитриевски и градоначалникот на Нови САД, Милош Вучевиќ.
– Свечениот чин на потпишување на Договорот за збратимување, беше одлична можност Градоначалникот Димитриевски да ги поздрави и сите присутни членови на бројните делегации, кои пристигнаа во Куманово по повод 11 Ноември, празникот на нашиот град – велат од општината.
Градот Нови Сад и Општина Куманово ќе воспостават соработка во областа на културата, науката, образованието, туризмот, спортот, во реализација на програми во областа на социјалната заштита, урбанизмот и комуналната дејност.
– Пријателството кое трае веќе долги години денес формално го потврдивме. Посебна чест ни е тоа што го потпишавме овој договор баш во рамките на одбележувањето од 75 години од ослободувањето на Куманово во Втората светска војна и 500 години од постоењето на овој град – рече Вучевиќ.
