Секторот за внатрешни работи Куманово поднесе кривична пријава против М.Ј.(58) и М.С. (58), двајцата поранешни градоначалници на општина Старо Нагоричане, како и против Г.Д.(40) од Куманово, раководител на Одделение за општи и правни работи во општина Старо Нагоричане. Тие се сомничат за сторено продолжено кривично дело „злоупотреба на службена положба и овластување“, соопштува Министерството за внатрешни работи.
Во периодот од 2014 година до 2015 година, второпријавениот, ја злоупотребил својата службена положба на тој начин што го изменил веќе постоечкиот правилник за систематизација на работните места во Општина Старо Нагоричане и го проширил бројот на извршители и систематизирал нови работни места во Територијална противпожарна единица пожарникар-возач (два извршители) и пожарникар (седум извршители), пропуштајќи за одредени работни места да внесе “да има положено возачки испит од „Ц“ категорија“ што е спротивно на член 11 став 2 точка 3. По ова, најпрво распишал јавен оглас за вработување на неопределено работно време на девет извршители на работните места, а потоа распишал уште еден јавен оглас за вработување на еден извршител (пожарникар). По двата распишани јавни огласи, вработил: командир на Територијална противпожарна единица пожарникари и пожарникар- возач.
-Третопријавениот иако знаел дека така изготвените правилници се со содржина спротивна на Законот за пожарникарство, до Агенцијата за администрација на РМ, испратил барања за писмена согласност како и барања за објавување на јавниот оглас до редакции на два дневни весници, решенија за потреба од засновање на работен однос на неопределено време, решенија за избор на најуспешен кандидат и решенија за склучување на договор за вработување на неопределено време, со што постапил спротивно на неговите пропишани работни должности и неговите овластувања-се наведува во соопштението.
Со наведените дејствија, осомничените им овозможиле на седум лица од општина Старо Нагоричане, да се вработат во Територијална противпожарна единица општина Старо Нагоричане и да се стекнат со противправна имотна корист од 5.233.117 денари (околу 85.000 евра), со што го оштетиле Буџетот на Општина Старо Нагоричане.
