Скопското обвинителство по спроведена истражна постапка поднесе до Основниот Кривичен суд обвинение против косовски државјанин кој во јакна се обидел да внесе кокаин во затворот „Идризово“.
– Обвинетиот, на 31 јануари, во просториите на Казнено-поправната установа „Идризово” во Скопје, при редовна посета на осудено лице, неовластено пуштил во промет наркотична дрога – кокаин со нето маса од 89,96 грама.
При влезот во установата, обвинетиот на затворскиот полициски службеник му предал пакет наменет за осуденото лице, во кој имало и една јакна. По извршениот претрес на пакетот, во внатрешниот џеб од јакната, во најлонско пакување обвиткано со селотејп, била пронајдена наркотичната дрога – кокаин.
Надлежниот јавен обвинител до Судот достави и предлог за продолжување на претходно определената мерка притвор за обвинетото лице, со оглед на тоа што и натаму постои опасност од бегство и можност тој да го повтори делото што му се става на товар, соопшти Обвинителството.
