Професорот Јове Кекеновски e со цврст став во однос на консултативниот референдум и со порака до власта дека не смее да помисли да ја менува одлуката на народот искажана на референдум. Одлуката на референдум е гласот на народот, им порачува Кекеновски на Заев и на Шекеринска во изјава за Плусинфо по информациите дека е можно власта да не ги почитува одлуките донесени на консултативен референдум.
-За ЕУ и НАТО Зоран Заев и Шекериска нема што да ги консултираат граѓаните од причина што најголем дел од нив јасно се определени за евроатланска интеграција, а и сите политички партии се ЗА.
По однос на Преспанскиот договор е некоректно и неетички граѓаните сега (отпосле) да се консултираат. Членот 27 од Законот за Референдум и други облици на непосредно изјаснување на граѓаните е дециден и јасен: За претходно консултирање на граѓаните за прашања од пошироко значење за Република Македонија може да се распише референдум на државно ниво за консултирање на граѓаните.
Ова е пост фестум, а на претходно консултирање. Лицемерие е сега да ги консултирате граѓаните затоа што договорот е веќе потпишан дури и спротивно на деловничките и процедуралните одредби е ратифициран во законодавниот дом. Што сега ќе се консултира?
Второ, тие забораваат дека одлуките донесени на консултативен референдум иако имаат советодавен карактер, но имаат и морална тежина. И тоа голема морална тежина. Одлуката донесена на консултативен референдум иако е советодавна, сепак мора доследно да се почитува. Не смее никој воопшто да помисли дека во инстуциите може да се донесат други одлуки кои се спротивни на донесенатта одлука дури и на консултативен референдум. Одлуката на референдум е гласот на народот. А, народот е тој што ја дава и одзема довербата – потсетува професорот Кекеновски.
