Голманот на Бешикташ, Лорис Кариус очајно сака да стави крај на својот престој во клубот. Според локалните медиуми, тој се поврзал со раководството на Ливерпул и замолил заемот кај „црните орли“ да биде прекинат.
Кариус не добил плата во период од 4 месеци. Се тврди дека турскиот клуб му должи над 1 милион евра. Покрај тоа, неговите настапи под рамката на голот не се импресивни и од Бешикташ се исто така склони на разделба.
Дваесет и пет годишниот Кариус стана непотребен на „Енфилд“ по финалето во Лигата на шампионите минатата сезона, во кој допушти две кошмарни грешки при поразот со 1:3 од Реал Мадрид. Неговиот договор со Бешикташ е до 2020 година, а во него фигурира и клаузула за задолжително откупување.
Се шпекулира дека интерес за Кариус пројавува Олимпијакос. Можно е Германецот да се врати и во Бундеслигата, каде кандидати за неговиот потпис се Ајнтрахт (Франкфурт) и Фортуна (Дизелдорф).
