Компанијата „Орка холдинг“ најостро ги демантира тврдењата на пратеникот и портпарол на СДСМ, Костадин Костадинов, дека бизнисменот Јордан Камчев, односно која било од неговите фирми била вклучена во финансирање на изборна кампања на ВМРО-ДПМНЕ.
„Најостро и со целосна одговорност ги демантираме тврдењата кои денеска ги произнесе во јавноста Костадин Костадинов, портпарол и пратеник на СДСМ, дека Јордан Камчев, односно која било од фирмите на Јордан Камчев била вклучена во финансирање на изборна кампања на ВМРО-ДПМНЕ.
Овие тврдења кои се на ниво на шпекулации произлегуваат единствено од меѓупартиското нетрпение и се резултат единствено на меѓупартиско препукување. Недозволиво е со цел освојување на ситни партиски поени да се задава ваков удар на приватните компании кои како значајна гранка од економијата на оваа држава успешно работат и без никакви државни тендери или државна помош вработуваат огромен број луѓе и придонесуваат за нејзиниот развој“, се наведува во демантот од „Орка холдинг“.
„Орка холдинг“ информира дека е компанија која моментално вработува 2.670 луѓе и само во периодот од 01.01.2019 до 30.06.2019 година во буџетот на Македонија по основ на различни даноци и придонеси исплатила 14 милиони евра, додека во истиот период по основ на плати за вработени исплатила бруто вредност од 17 милиони евра од кои 5 милиони евра за придонеси.
„Спротивно на она кое моментално се случува, сметаме дека државата и партиите се оние кои треба да го поддржат и помогнат работењето на ваквите компании кои нудат вакви вредности за сите, а не да го рушат нивниот углед и да фрлаат црна сенка на нивното работење“, се додава во демантот од „Орка холдинг“.
Костадинов, денеска на прес конференција побара од Мицкоски да одговори дали Орце Камчев е финансиер на изборната кампања на ВМРО-ДПМНЕ за последните претседателски избори и колку тоа ги чинело неговите фирми?
