Корисничка на социјалната мрежа Редит, позната под името Шелби, се изненадила кога сфатила дека нејзин таен Дедо Мраз е милијардерот Бил Гејтс.
Шелби своето искуство го раскажа во видео на социјалните мрежи, каде ги покажа подароците што ги добила од Гејтс на домашна адреса. Пакетот со подароци тежел над 36 килограми.
За подарок добила уникатна копија од книгата „Големиот Гетсби“, книга со факти за серијата „Твин Пикс“ и режисерот Деjвид Линч, уникатна јакна поврзана со телевизиската серија, лего од „Војна на ѕвездите“ и „Хари Потер“.
Таа добила подарок и интересен избор на слатки, свеќа, голем број книги, но и играчки за нејзината мачка.
Сепак, она што најмногу ја допрело било донација за здружението Американската асоцијација за срце, кое се занимава со кардиоваскуларни истражувања. Донацијата е во чест на нејзината мајка која починала во март годинава.
– Тоа ми значеше повеќе отколку што можам да опишам со зборови – рекла девојката и додала дека годинава ѝ е тешка поради смртта на нејзината мајка.
Гејтс секоја година учествува во симпатичното дарување кое го организираат корисниците на Редит. Милијардерот и претходните години дарувал подароци на непознати корисници на оваа социјална мрежа.
ФОТО: Принтскрин/Јутјуб
