Околу 50 луксузни и несекојдневни олдтајмери и 20-тина моторцикли ќе бидат дел од „Skopje Classic Day“ 2018 што ќе се одржи во недела на плацот кај авиончето во општина Аеродром.
Меѓу нив ќе има и околу 10-тина автомобили донесени од соседните држави кои за првпат ќе бидат видени во Македонија. Возилата ќе бидат постари од 35 години што е услов за да се класифицираат како олдтајмери.
– Идејата е да се претстават олдтајмерите што ги има во Македонија заедно со возилата кои ќе бидат донесени од четири соседни држави. Граѓаните ќе имаат можност да поминат ден од викендот дружејќи се со одбрани автомобили и моторцикли кои не се гледаат секојдневно, велат во разговор со МИА двајцата организатори на настанот Благоја Петровски и Игор Стефановски, кои неодамна по трет пат во Скопје го организираа и „Distinguished Gentleman’s Ride“.
Двајцата истакнуваат дека сакаат да организираат настан кој ќе биде поразличен од останатите и на кој ќе бидат претставени олдтајмерите во едно поинакво светло.
– Ќе има индивидуално претставување на секое возило и ќе се обидеме да ангажираме девојки кои ќе имаат соодветен аутфит со периодот од кој потекнува возилото со цел да се добие целосен впечаток за тој временски период. Селектираме автомобили и моторцикли бидејќи идејата не е да одиме на квантитет, туку на квалитет, велат Стефановски и Петровски.
Во рамки на настанот ќе биде доделена и награда за најдобра целосна презентација што е пракса во државите каде се организираат вакви настани.
Замислено е да има динамична и статична презентација на возилата со кратка приказна за возилото. – Секој има приказна врзана за своето возило – како го нашол, колку време му било потребно да го рестарвира возилото……, вели Петровски.
Двајцата неуморни љубители во олдтајмерите и урбаните мотори најавуваат дека ова е само почеток на нивната идеја овој настан да премине во традиција.
ФОТО: МИА
