Автобусот на актуелната претседателка и кандидатка за претседател на Хрватска Колинда Грабар Китаровиќ вчера доцна попладне имал сообраќајка во Крапинско-загорската жупанија.
Возачот на автобусот во кој била и Колинда удрил во возило кое било на патот по што продолжил. Оштетената Силвија Солдо во разговор за РТЛ рекла дека несреќата се случила на „незгодна и доста тесна улица“.
– Јас и синот бевме во автомобилот и забележавме дека претседателската поворка оди кон нас. Пред нас имаше автомобил кој сврте малку во десно- рекла Солдо и додала:
– Удрен е целиот лев дел од автомобилот, откорнат е ретровизорот, а најмногу е оштетена задната врата каде седеше мојот син. Тој малку удри со коленото. Малку го боли па мора на преглед кај хирург – рекла Солдо.
Жената повикала полиција, која направила увид.
