Доколку би докажал само една од серијата клевети што ги искажа на моја адреса градоначалникот на Сарај и поранешен министер за правда Блерим Беџети во неговото синоќешно гостување на ТВ21, јас Мухамед Зеќири јавно изјавувам дека ќе се повлечам од политичкиот живот и подготвен сум да сносам целосна морална и кривична одговорност, најави Зеќири на Фејсбук.
– Нема да се повикувам на мојот имунитет кој го уживам како пратеник!!!
Неговите тврдења за моја наводна инволвираност во трговија со мигранти и други изнесени невистини и клевети ќе мора да ги докажува на суд, па макар предметот се паднал кај некој од судиите кои се именувани, или произлегле од тефтерчето на Гордана, Сашо Мијалков, Муса Џафери и лично од Блерим Беџети, пишува Зеќири.
Тој, како што вели, го предизвикува Беџети двајцата да се подложат на нарко-тест и резултатите јавно да ги објават, бидејќи многумина негови познаници тврдат дека е нарко-зависник.
– Ако тоа се потврди, ќе размислам да му простам на суд оти ќе сметам дека не знаел што зборува и дека можеби бил под дејство на наркотици, напиша Зеќири.
