Движењето БЕСА нема да поднесе амандмани на предложените измени на Изборниот законик во Собранието за промена на изборниот модел од шест во една изборна единица и останува на ставот за три изборни единици со отворени листи, изјави денеска пратеникот од БЕСА Фадил Зендели. Предлагаат наместо сегашните шест изборни единици во по една да се спојат првата и втората, третата и четвртата и на петтата и шестата.
Прашан дали ќе го бојкотираат гласањето на предложените измени Зендели рече дека не верува оти ќе дојде до такво нешто ако има избори во април. Подносителите и сите кои ги поддржуваат измените треба да сметаат на тоа дека Изборниот законик се менува со консензус и не би требало никој да дејствува еднострано, изјави Зендели во Собранието.
Со една изборна единица со затворени листи, како што наведе, во суштина ништо не се менува, и тоа е само замајување на јавноста дека нешто се менува.
– Ако сакаме да менуваме нешто тоа мора да биде посуштински и порадикално во насока на демократизација. Имам разбирање за политичките партии и помалите етнички заедници кои бараат Изборниот законик да се менува, но мора да мислиме на целото општество и сите етнички заедници во државата и во таа насока концептот кој ќе го менуваме или ќе го спроведе треба да биде во согласност со ова – рече Зендели.
Три изборни единици со отворени листи, појасни, менуваат многу зашто македонските политички партии функционираат на целата територија на државата, а политичките партии на Албанците само во западниот дел. – Во оваа насока нам како Албанци и како политичка партија не ни одговара да имаме една изборна единица затоа што нема да имаме контрола што се случува во Штип, Струмица… Немаме доверба оти имаме фер и демократски избори и затоа сметаме дека треба да бидат така како што се соодносите во општеството, рече Зендели.
Во коментар за бројните поднесени амандамни од ВМРО-ДПМНЕ и ДУИ на измените на Изборниот законик пратеничката од опозициската ВМРО-ДПМНЕ Елизабета Кузмановска оцени дека тука може да се види, како што вели, дволичноста на владејачката СДСМ.
– Требаше првин да си го повикаат својот коалициски партнер кој поднесе околу 5.000 амандамни. Нашите 500-600 амандмани се во насока на давање јасен сигнал дека два месеца пред избори не се отвора Изборен законик – изјави Кузмановска.
