Уништен е турски инсулин од стоковите резерви и станува збор за инсулин набавен со паралелен увоз во време на претходната влада, без проверен ладен ланец, без познато потекло и без оригинал сертификати, реагира Министерството за здравство на обвинувањата на ВМРО-ДПМНЕ дека е уништен здрав инсулин.
– ВМРО-ДПМНЕ знаеле за тоа и должни се да одговорат зошто си играле со здравјето на пациентите? – констатираат од Министерството за здравство.
Оттаму тврдат дека нов тендер за набавка на инсулини нема, затоа што за тендерот од 2018 година веќе се склучени договорите.
– Количините од стоковите резерви не се никако поврзани со количините за тендер. Воведени се три нови типови на инсулин, кои се најнова генерација на лекови – оригинални, со сертификат за квалитет и не се од паралелен увоз. Сега граѓани примаат оригинални инсулини. Не е како порано, да примаат инсулин без проверен ладен ланец и без оригинал сертификати. Во 2018 година се донесоа измените и дополнувањата на Законот за лекови и медицински средства. Оттогаш, сите лекови во нашата држава се со сертификат за квалитет. Нема повеќе инсулини од паралелен увоз – велат од Министерството.
Претходната Влада, наведуваат од Министерството, им го скрати буџетот на пациентите со дијабетес.
– Во 2016 година буџетот за оваа ставка изнесувал 730 милиони денари, а 2017 година го намалиле и изнесувал 562 милиони денари. За 2020 година, предвидено е да изнесува 750 милиони денари. Зошто покрај инсулините од паралелен увоз го намаливте и буџетот? Тоа не е вистинска грижа за пациентите! – велат од Министерството за здравство.
