Надлежен јавен обвинител од Основното јавно обвинителство Струга донесе наредба за спроведување истражна постапка против три лица, државјани на Република Албанија, за сторено кривично дело – неовластено производство и пуштање во промет на наркотични дроги, психотропни супстанции и прекурсори. Ова го соопшти службата за односи со јавноста на Јавното обвинителство на Република Македонија.
– Осомничените на ден 22.12.2018 година околу 1.40 часот како соизвршители неовластено заради продажба пренесувале шеесет и девет килограми и триста и десет грама дрога – марихуана. Дрогата претходно ја спакувале во црни најлонски ќеси и ја пренесувале на магистралниот пат Струга – Ќафасан во близина на село Франгово. Притоа биле откриени и приведени од страна на овластени службени лица на Министерството за внатрешни работи – стои во соопштението.
Надлежниот обвинител ценел дека постојат околности што укажуваат на опасност од бегство, поради што до судија на претходна постапка од Основниот суд Струга доставил предлог за определување на мерката притвор за тројцата осомничени.
