Премиерот Зоран Заев, со владината делегација, на маргините на Самитот на шефови на држави и на влади на НАТО во Брисел, имаа средба со сенаторите од САД, Том Тилс, од Републиканската партија, и Џин Шајен, од ДемократСката партија.
Премиерот Заев на средбата, во негово име, во име на Владата на Република Македонија, и во име на народот на Република Македонија го истакна задоволството од поканата нашата земја да го отпочне пристапниот процес за полноправно членство во НАТО, и се заблагодари за исклучителната поддршка за овие аспирации на земјата што сите овие години наназад доаѓа од САД.
Заев информираше на средбата за сите реформи и прилагодување што во изминатите години Република Македонија ги правеше и ги прави на планот на прилагодувањето на нашите одбранбени политики и на АРМ соодветно на НАТО стандардите, како и за мисиите што припадниците на нашата армија ги реализираат, рамо до рамо, со американските, како и со војниците од другите земји сојузници од алијансата.
Премиерот нагласи дека поканата за полноправно членство за нашата земја е и силен поттик за сигурност, стабилност и развој, како за нашата земја, така и за регионот.
Сенаторите Том Тилс и Џин Шајен на средбата испорачаа честитки за поканата Република Македонија да ја отпочне завршната фаза за членство во НАТО, и ја изразија нивната, благодарноста на Сенатот на САД за сојузот и за поддршката на нашата земја во мисиите на НАТО, и информираа за постапката за ратификација на нашето членство во НАТО во САД, за што изразија уверување дека во Сенатот на САД ќе добие широка поддршка.
