Вечерашниот прием по повод 4-ти јули, Денот на независноста на САД, се одбележа во знакот на џинсот.
Амбасадорот Џес Бејли побара од гостите да дојдат облечени во фармерки, а за да бидат во боите на американското знаме, требаше да носат маичка или кошула во бела боја или некој црвен детаљ.
Гостите го испочитуваа барањето на амбасадорот, меѓу кои и премиерот Зоран Заев и неговата сопруга Зорица.
Сопругата на Бејли, Кејти Бејли, објасни дека идејата била оваа година гостите да го прослават празникот во американски стил.
– На денешен ден Американците не одат на официјални приеми во костуми и тоалети. Ние го поминуваме денешниот ден со нашите фамилии. Правиме скари, пикници и паради, ја пееме нашата химна, седиме на трева и го гледаме огнометот. Го користиме тоа време за да размислиме што претставува Америка за правата и слободите кои ги уживаме – рече таа.
Според Џес Бејли, фармерките симболизираат врска помеѓу Источна Европа и Западот.
– Многумина овде ми раскажувале како патувале до Италија за да купат еден пар „левис“ фармерки, платени со грижливо заштедените пари – рече тој.
Химната на Македонија годинава беше интонирана од Јана Бурческа.
Фото: Томислав Георгиев (Фокус)
