Премиерот Зоран Заев не гледа одговорност во неговиот протокол за разговорот со руските комичари кои му се претставиле како поранешниот претседател на Украина, Петро Порошенко, и генералниот секретар на НАТО, Јенс Столтенберг.
Тој смета дека ова не е прашање поради кое и тој како премиер треба да си поднесе оставка туку од ова треба да се извлече поука.
– Почитувани се сите протоколи кога некој бара да биде поврзан. Во овој разговор не гледам дека има издавање на државни тајни и жалам за споделувањето на телефоните. Немам намера да поднесам оставка, а од ова ќе излеземе само посилни — рече Заев.
Тој одговарајќи на новинарски прашања рече дека разговорите биле правени преку апликацијата „ВатсАп“, првиот е правен од неговата канцеларија на Илинденска бр.2. Раскажувајќи како дошло до разговорот, премиерот рече дека прво бил контактиран неговиот кабинет и бил побарано воспоставување разговор на него со Порошенко. Кога од протоколот му кажале, Заев се согласил и кажал кој термин му одговара – помеѓу два состанока.
Зборувајќи за протоколот, Заев рече дека не била контактирана украинската амбасада и објасни дека најчесто договарањето разговори оди преку амбасадите со земјите кои не се блиски, но со оние со кои веќе контактирале и имаат воспоставено комуникација, контактираат директно кабинетите. А неретко, рече премиерот, се случува и функционерите директно да контактираат. Кога се прават вакви разговори, до Заев најчесто е некој од советниците кои фаќаат белешки и потоа ги доставуваат до архива.
– Се случил ваков пропуст и им се извинувам на граѓаните. Моја олеснителна околност е што сум во добро друштво – рече Заев кој рече би бил најсреќен ако успеел уште во првата минута да ја препознае измамата, но за жал, посочи, и тој е човек од крв и месо.
Тој рече дека досега ниту од Порошенко, ниту од Столтенберг, како и од оние кои се споменуваат во разговорот, не добил никаква реакција.
Заев не верува дека вакви лажни разговори има и со други функционери, како што е германската канцеларка Ангела Меркел.
Прочитајте повеќе од денешната прес-конференција:
Заев: Жртва сум на мојата отвореност, не сум издал државна тајна
