Лидерите Зоран Заев и Билал Касами попладнево на средба се очекува да прецизираат дали СДСМ и Беса ќе бидат двете партии кои ќе ја официјализираат првата македонско-албанска предизборна коалиција за парламентарните избори на 12 април.
Средбата Заев-Касами за Плусинфо ја потврди висок функционер на Беса. Лидерскиот состанок следува по средбите на претставниците од двете партии на пониско ниво. Според најавите, на попладневниот состанок се очекува Заев и Касами да се усогласат околу, како што вели нашиот извор, за ситни детали пред првата предизборна македонско-албанска коалиција да биде и официјализирана.
Како што веќе објавивме, начелен договор за коалиција помеѓу СДСМ и Беса бил постигнат викендов во разговори на високи партиски функционери од двете партии.
Според информациите, кај двете партии има согласност за соработка и проценката на власта е дека предизборната коалиција помеѓу СДСМ и коалицијата и Беса е победничката опција која на Заев би му донела чист премиерски мандат, односно најмалку 61 пратенички мандат.
Според Беса, за СДСМ начелно е прифатливо Касами да биде носител на Шестата изборна единица, како и добитни места на листите во останатите изборни единици.
Доколку СДСМ и Беса се договорат за заеднички предизборен настап, неизвесно е дали и партијата на Мендух Тачи ќе биде дел од коалицијата со оглед на испорачаните услови до Заев, Тачи да биде вицепремиер и во новата влада да не биде партијата на Али Ахмети.
Коалицијата помеѓу СДСМ и Беса, ќе дојде откако Касами испадна од игра за трипартиска коалиција помеѓу Алијансата за Албанците, Алтернатива и Беса, која се најавуваше како добитна комбинација за уривање на ДУИ на Али Ахмети.
