По повод прославувањето на еврејскиот празник Ханука, претседателот на Владата на Република Македонија, Зоран Заев, придружуван од амбасадорот на Израел за Македонија, Ден Оријан, за прв пат го прославија почетокот на празничните денови Ханука, денови на посветеноста и фестивалот на светлината. Ова стои во соопштението од Секторот за односи со јавноста од Владата на Република Македонија.
Премиерот Заев посакал пријатно празнување на граѓаните во Република Македонија и во светот на овој голем еврејски празник. Тој посакал сите да бидеме светлина таму каде што сме.
– Овој празник ме потсетува на тоа дека и кога изгледа невозможно да се помисли на победа, тогаш се појавува исклучителна сила и мотивација која не води напред. Тогаш сме соочени со сето она за кое вреди да се искористат последните сили. Така било и 165 години пред нашата ера кога наново бил осветен храмот во Ерусалим. Со нашите драги пријатели од Израел денес се сеќаваме на една таква чудесна победа за израелскиот народ. Прославувањето на Ханука ни ја праќа пораката дека дури и најмалото светло ја поразува темнината. Дури и една мала држава како Македонија со препознавање и вреднување на различноста го осветлува патот за цел регион и носи порака на мир и победа на доброто – порачал премиерот Заев.
Амбасадорот на Израел за Македонија, Ден Оријан, изразил големо задоволство за одбележување на празникот Ханука. Тој потенцирал дека oвој настан е уште еден показател за силните односи меѓу двете земји, важноста и соработката во областа на наследството што го делиме со Македонија.
– Тесните билатерални односи се зајакнати со јасен став на Македонија да ги поддржи напорите за да ја раскаже приказната за минатото, создавајќи еден фонд за холокаустот и музејот и земајќи активно учество за претворање на старите еврејски гробишта во Битола во спомен парк, со испраќање на наставници во Јад Вашем и борбата против антисемитизмот – истакнал амбасадорот Оријан.
На ова прво одбележување на највисоко ниво на Ханука во Република Македонија, гостин бил и Тал Броди, почесен амбасадор на добрата волја на државата Израел и своевремен кошаркар, кој имал играно во националниот тим на САД а подоцна во Израел. Броди изразил огромна благодарност што Македонија денес за прв пат на ваков начин го одбележува овој празник и сведочи за солидарноста помеѓу помалите држави да дадат заеднички глобален придонес.
