Министерот за здравство Венко Филипче ќе предложи ограничување на јавни собири, сосе спортските настани, за што Владата денеска треба да донесе одлука.
– Предлогот е да се забранат сите јавни собири каде има голема бројка на граѓани, без разлика дали се во затворен или отворен простор. Треба да се откажат сите големи јавни собири и спортските натпревари – рече Филипче.
Предлогот е забраната да важи една недела, а доколку има потреба, ќе биде решено дали таа ќе продолжи.
Филипче нагласи дека се што се презема е системот да се подготви за превенција и третман на пациентите.
– Ние не може да знаеме што ќе очекуваме. Го подготвуваме системот за еден, двајца, тројца, десет или повеќе пациенти. Има многу непознаници за вирусот и мора да се подготвиме – додаде Филипче.
Препораката компаниите и институциите да не им дозволуваат на оние вработени кои престојувале во Италија откако таму се појавија првите заразени, да доаѓаат на работа, и натаму важи. Тие прво мора да останат 14 дена во домашна изолација – толку трае инкубацијата на вирусот.
И останува апелот да не се патува во земјите каде има епидемија, без некоја поголема потреба.
