Неколку пациентки од Скопје кои уште кон крајот на август биле повикани на мамографско снимање на дојки преку организираниот скрининг, тврдат дека сѐ уште ги чекаат резултатите од прегледот.
– Баш се израдував кога ми стаса картичка дека треба да закажам мамографија на дојки преку организираниот скрининг. Имам 52 години и сум во групата која треба редовно да ги прави овие прегледи, на секои две години. Дополнително ми олесни тоа што не морав да закажувам преку „Мој термин“ и да чекам, но и тоа што снимањето беше бесплатно. Се јавив на телефонот и ми закажаа мамографија некаде во средината на септември, кога и се снимив на Клиника за радиологија, а ми посочија дека резултатите ќе ги добијам по пошта. Но еве поминува и ноември, а јас не ги добив резултатите – раскажува скопјанката М.Т.
Таа ги напишала личните податоци, сосе адресата на живеење, во прашалникот што ѝ бил даден пред да се сними.
А пак, други пациентки кои направиле мамографија во оваа установа, но со закажување на „Мој термин„, во редовна постапка, тврдат дека за 4 дена ги добиле резултатите.
– Се снимив во четврток, а ми рекоа дека од среда ќе биде готов наодот, што и се случи. И пријатно сум изненадена што не се чека и по две -три недели за резултат – вели 55-годишна скопјанка Љ.П.
Во врска со тоа која е причината зошто некои пациентки чекаат повеќе на резултатите, од Министерството за здравство со одговор:
– Согласно препораките од програмата за скрининг, извештаите од лекарите треба да се пишуваат следниот ден по снимањето, а најдоцна до 7 дена. Потоа одговорите автоматски се подготвуваат и се испраќаат по пошта (неколку пати во месецот). Инаку, Управата за Електронско здравство досега е информирана само за еден случај (во октомври годинава), на УК за радиологија заради технички превид, резултатите од прегледот се подоцна внесени од страна на лекарите – тврдат од ресорното Министерство.
Надлежните потсетуваат и дека телефоните за закажување на прегледот се во Центрите за јавно здравје и сите жени дополнително може да се обратат (и тоа е наведено во поканата) на мејл адреса: mamografijaskrining@zdravstvo.gov.mk, која може да се користи и за сите други информации поврзани со скринингот.
Од Министерството за здравство денеска појаснија дека ќе воведат и нови начини за информирање на пациентките.
– Министерството за здравство планира да воведе посебна линија (call centar) за оваа намена, а воедно и можноста за жената за својот преглед, на нејзино барање, да го добие одговорот и на мејл – додаваат надлежните.
