Државна видеолотарија реагира со соопштение дека е трговско друштво со ограничена одговорност, во која државата е застапена со 51 процент преку Државна лотарија, а 49 отсто е приватен странски капитал.
„Компанијата е основана во јули 2014. Ние не сме буџетски корисник. Напротив, ние придонесуваме за раст на приходите на државниот буџет. Во 2019, по основ на данок на добивка, данок на личен доход, посебна давачка од игри на среќа, ДДВ и дивиденда, државниот буџет од Државна видеолотарија се дополнил со 750.966.809 денари“, се наведува во соопштението.
Од Државна видеолотарија велат дека како општествено одговорно компанија настојуваат да бидат одговорни кон ранливите категории во општеството, но и да придонесат за унапредување на спортот, образованието и културата. Државна видеолотарија, како што се наведува, е единствена компанија која развива и применува програма за одговорно играње во земјава.
„Врз основа на постигнатите резултати од 2018 година, друштвото Државна видеолотарија, е регистрирана како 23 најуспешна компанија во земјава, која успешно се бори на пазарот на игри на среќа со приватниот сектор. Со цел да можеме да го обезбедиме нормалното работење на нашата компанија, сите набавки, ги реализираме согласно регулативата за јавни набавки. Набавката која стана дел од пропагандниот наратив на опозицијата пред избори е манипулација. Државна видеолотарија не троши државни пари, ние не сме буџетска институција“, се посочува во соопштението.
Од Државната видеолотарија велат дека јавната набавка е согласно планот за јавни набавки од јануари 2019. Набавката е рамковна за период од две години (сукцесивна согласно потребите на друштвото). Целата процедура за набавка, како што се наведува, е транспарентна и согласно законот. Тендерот првично беше објавен на 14 октомври 2019, но не се јави ниту еден заинтересиран, поради што целата постапка се повтори. Бирото за јавни набавки изврши управна контрола на постапката која резултираше без суштински забелешки на постапката.
„Постапката беше повторена на 4.12.2019, а во текот на оваа постапка повторно беше извршена управна контрола на Бирото за јавни набавки, од која и во овој случај немаше забелешки. На ова постапка, пристигна само една понуда која ги задоволуваше бараните критериуми, по што е потпишана рамковната спогодба за реализација на јавната набавка. Потенцираме дека спогодбата се однесува на временскиот период од две години, во кој сукцесивно ќе вршиме набавка согласно потреби на работењето на компанијата. Ова значи дека нема веднаш да бидат набавени 1.500 апарати, туку ќе се набавуваат апарати согласно потребите на друштвото за нормално функционирање на истото“, наведуваат од Државна видео лотарија.
