При нагла промена на времето сме и понервозни, поимпулсивни, а може да се појави и несоница. Многу е важно бегството во природата – колку што е можно повеќе да престојуваме на чист воздух, да бидеме опкружени со зеленило и да „гушнеме“ некое дрво, советува д-р Елена Карева Пиловска, специјалист психијатар и шеф на смена во скопската Служба за итна медицинска помош.
Температурите од денеска попладне значително ќе опаднат и тоа за повеќе од 10тина степени, па од плус 23 степени Целзиусови колку што беа измерени деновиве, в среда наутро минималните ќе се спуштат и до минус 3, а дневните ќе се движат од 6 до 13 степени.
Лекарите од Брза помош објаснуваат како оваа драстична промена ќе се одрази врз нашето здравје.
– Секако дека постои врска меѓу здравствената состојба и временските прилики, особено при нагли промени во атмосферскиот притисок. Временските осцилации како наглата промена во температурата, влажноста и атмосферскиот притисок, може да доведат до промена во здравствената состојба во организмот и кај хронично болните, а сѐ почесто и кај дотогаш недијагностицирани, навидум здрави лица. Промената во здравствената состојба кај здравите лица е поради зголемениот стрес кој дополнително го намалува имунитетот на организмот. Може да се јават и промени од психичка природа како умор, еве, на пример, денеска сите се чувствуваме некако уморно, но можни се и нагли промени на расположението – од безволност до зголемена раздразливост – вели д-р Карева Пиловска.
Таа додава дека при ваква нагла промена на времето сме и понервозни, поимпулсивни, а може да се јави и несоница.
– Може да се јават мачнини и вртоглавици, а сега тегоби ќе почувствуваат и астматичарите поради зголемената влажност во воздухот, а ќе се јавуваат и влошувања на симптомите (егзацербации) кај лицата со хронични заболувања, како срцеви и белодробни и кај лицата со зголемен крвен притисок. Важно е да се напомене дека ако е низок атмосферскиот притисок, кај лицата кои се со низок крвен притисок може да дојде до пад на притисокот, па според симпомите, тие треба да внесуваат повеќе течности. Затоа, многу е важно бегството во природата – колку што е можно повеќе да престојуваме на чист воздух, да бидеме опкружени со зеленило и да „гушнеме“ некое дрво! – додава д-р Карева Пиловска.
Таа предупредува дека промените на времето секако може да ги почувствуваат лицата со висок притисок, но ако се бурни реакциите, со силно срцебиење и зголемен притисок, во тој случај овие лица, како што вели д-р Пиловска, да не се правдаат со „ништо не ми е, тоа е само од времето“, туку задолжително да се јават на лекар.
Во Брзата помош е зголемен бројот на повици, но лекарските екипи интервенираат кај пациентите со акутно животно загрозувачки состојби, но често и кај хронично болните со нагли влошувања на здравствената состојба.
Од УХМР прогнозираат дека облачно, ветровито и врнежливо време ќе преовладува до утре до средината на денот. На планините и на повисоките места ќе се формира снежна покривка. Ќе дува умерен до засилен северен ветер кој ќе биде најизразен утре претпладне, а дневните температури ќе бидат во значително опаѓање.
