Драган Цикуроски од Прилеп планинари четириесетина години низ планините во земјава и во странство. За време на многуте организирани планинарски акции, овој 56-годишен човек претставува атракција со стоењето на раце и со свирењето на усна хармоника.
– Живеам под Маркови кули и отсекогаш сум ги сакал камењата и планините – вели Цикуроски.
Уште како мало дете бил многу подвижен и научил да стои на раце. Од дете многу ја сакал атлетиката, а научил да скија и да плива. Играл фудбал и генерално, ги сака сите спортови. Својата вештина на стоење на раце ја искажува и на карпи.
Но, неговите вештини не запираат на спортот, туку се шират и кон музиката. Уште од најрана возраст, некаде од околу три-четири години почнал да свири усна хармоника што исто така го смета за свој талент.
– Од прва, веднаш ја засвирив „Билјана платно белеше“. Како цел живот да сум ја свирел. И оттогаш редовно свирам, особено кога сум на планинарење – кажа тој, а неговите пријатели додадоа дека тој и птиците се натпејуваат во природата.
По професија е машински техничар. Затоа знае да каже дека како што има техника во машинството, така има и во стоењето на раце и во свирењето на усна хармоника.
Оние што го познаваат, велат дека околу себе шири само позитивна енергија. Секогаш е забавно да се биде во негово друштво. Во тоа се уверивме и самите во неколку планинарски доживувања.
Драган е член на планинарското друштво „Картуш“ од Прилеп.
