Новата Влада дојде пред повеќе од една година. Дојде со ветување дека ќе направи промени и дека ќе обезбеди „Живот за сите“. Арно ама најде празни каси и големи долгови. Претходниците собрале сѐ. Не оставиле ама баш ништо. Новите градоначалници најдоа куп неплатени сметки. Сметки за струја, комуналии, за превоз на ученици и за што уште не.
Така рекоа од првите луѓе во Владата па сѐ до градоначалниците. Јавно рекоа дека тие пред нив однеле сѐ. И толку. Времето си минува, а работите стојат на место. Животот за сите го нема никаде. Како да се изгубил и тој во некоја од неплатените сметки. Низ шепот рекоа: „Народе со празна каса што можеме да се направиме!“. Иако низ шепот јавно кажаа. Рекоа и дека против сите претходници, кои нечесно работеле, ќе бидат поднесени кривични пријави. Тоа го рекоа пред седмата сила, а тие сето тоа од збор до збор го пренесоа до народот. А оние гласила, кој сѐ уште си „тераат“ по наредба на претходните и кукулчиња на ова ставија. Никој ништо не им може. Не ѝ може никој ни на Македонската радио телевизија која „апла“ си тера по свое, а пари добива од Владата.
Против сите рекоа дека ќе поднесат кривични, а ниту полиција ниту јавните обвинителства не ги ангажираа да „соберат“ докази дали навистина е така или не. Досега ниту еден поранешен градоначалник не е обвинет. Зошто? Зошто и по повеќе од една година молчи полицијата и зошто сѐ уште многу од првите луѓе во јавните обвинителства не се сменети или пак само столчето го сменија, а со него ги однесоа и сите докази што ги имаа за „своите“ претходни „другари“. И сега нема докази или пак „испитувањето“ и „собирањето“ на доказите оди многу тешко.
И додека се чекаат доказите голем број од оние што треба да одговараат за сето она што ја доведоа државава на ова дереџе, си седат на старите директорски, управнички, началнички и кој знае уште какви ли не места и сеир си гледаат. Демек тие се незаменливи. Нема подобри од нив. Да, токму како што народот вели: „Ни мува не ги каснува!“ И згора на ова „под мустаќ се смешкаат“ и демократија бараат. Да. Демократија. Велат дека оваа Влада краде, а нивната што со милиони евра ја задолжи Македонија, цвеќе била. Нивните „арамии“ неправилно биле обвинети и дека треба да бидат ослободени. Ако не, нема референдум и нема да го прифатат договорот за промена на името со Грција, кој на Македонија ѝ е единствена виза за влез во НАТО и ЕУ. А и тие велат дека се за НАТО и ЕУ ама сѐ прават Македонија никогаш да не влезе во тоа семејство.
Сите оние што го очекуваа подоброто утре и „живот за сите“ отворено се прашуваат: Кога арамиите и сите други кои десет години цицаа и од народот и од државата и кои земјата ја задолжија до гуша и кои Македонија ја скараа со сите, ќе поднесат сметка. И до кога ајдуците и понатаму ќе бидат газди!? Не е малку време од повеќе од една година! Доста се молчеше!.
