„Каде што е потребна мотика молитва не помага“! Така рекол народот. А и така е. Доста само политика се „продава“ во оваа наша Македонија. Доста обвинувања дека едните работат добро, а другите дека само „делничат“. Младите за да не „бегаат“ бараат работа. Треба да се засукаат ракавите. Молитвите и кавгите нема да помогнат. Доста е политика!. Тоа нека го прават политичарите. Доста е со обвинувања дека се што прави Владата нечини. Дајте им работа на работниците, а не молитва. Не ги викајте на демонстрации! Не им ги полнете главите со омраза! Не заборавете дека на едната страна е таткото, а на другата синот. Доста со поделби! Доста од најмало до најстарите во оваа наша Македонија само политика да се води!?
За оние од ВМРО-ДПМНЕ, на чело со лидерот Мицковски, ништо не е добро. Опозиција биле и оправдано им било. Но до каде!? Велат дека нечини Македонија да го реши проблемот со Грција, дека нечини Преспанскиот договор, нечини Македонија да влезе во НАТО и ЕУ. Што за нив чини? Кога некои ќе ги праша што е тоа што чини!? Молчат и не кажуваат! Зошто? Немаат одговор! И наместо да дадат одговор за доброто на Македонија тие само продолжуваат да критикуваат. Знаеле како подобро да го решат проблемот со името, а единаесет години кога беа на влас не го решија. Знаеле се, ама не кажувале за другите да не добијат поени. Гајле им било за Македонија и за македонскиот народ. Најважно за нив било што побрзо да се вратат на државни „јасли“ и повторно да ги „фатат“ фотељите. Важно е да се напаѓа Владата, да се оцрнува! Забораваат дека ако направат нешто добро народецов македонски ќе знае да ги награди, а сегашните да ги казни!
И така Македонија веќе три децении животари. Не живее туку „животари“. Продава политика, а не гради фабрики. Плодната земја и во Овчеполието и во Пелагонија и во Полог и во струмичко и на секаде е неизорана, непосеана. Селата опустеа. Народот си замина. Младите и тоа оние најспособните, инженерите, лекарите, металците и кој ли уште не, кој требаше да бидат иднината и кои требаше на грб да ја носат Македонија, си заминаа. Побараа работа и добри плати, а челниците, оние и од СДСМ и од ВМРО-ДПМНЕ и од ДУИ, наместо работа им дадоа „молитва“. Рекоа ако си „наш“ ќе се најде место за теба, а ако не си, собери си ја дипломата и целиот живот во „крпче“ и фаќај пат во светот за да си обезбедиш парче леб. И едните и другите добро знаат но, ама ич не им е „гајле“ дека Македонија е „преполовена“, дека Македонците си заминаа.
Што треба на опозицијата да и се вети за да дојде до помирување?. За да подаде рака и да почне заеднички да работат за Македонија. Мотиката да ја земат во рака, а молитвата да ја остават за други времиња. Да не бараат „во јајцето влакно“!?.
И ВМРО-ДПМНЕ и СДСМ и ДУИ , во името на народот, во името на Македонија, ајде направете нешто добро. Сите да ви „заблазат“! Оставете ги молитвите, оставете ги караниците, „плукнете“ си на рацете и фатете се за работа. Задржете ги младите експерти и направете Европа да дојде во Македонија!. Направете го тоа! Доста мислевте само на себе! Не го заборавајте народот!?
