Најдоброто лево крило во Лигата на шампионите Тимур Дибиров рече дека се уште не верува дека по втор пат со Вардар е на европскиот ракометен трон.
– Не знам што да кажам. Немаме појма како станавме шампиони. Сакавме да се бориме до крај и го направивме тоа. Не можам ниту да замислам дека по втор пат ќе го поминам овој пат со трофејот од ЛШ и ќе имаме ваков пречек – изјави Дибиров.
За сензационалната победа против Барселона во полуфиналето кажа: „Страшно пцуење на полувремето. Се договоривме да изгинеме на терен, да умреме ама да не изгубиме“.
Голманот на Вардар, Дејан Милосављев во својата дебитантска сезона во вардаровиот тим стигна до шампионскиот трофеј во елитната лига.
– Ова е нестварно. Благодарност за навивачите. Благодарност и до тренерот Дејан Периќ. Знаеше дека сум млад, но веруваше во мене. Ме чуваше од некои работи кои можеа да ме исфрлат од ритам. Горд сум на овој клуб, на семејството и на сите кои се со нас. Би сакал еден ден повторно да се вратам во Скопје. Вардар ми е во срцето – рече Милосављев.
Србинот следната сезона ќе настапува во Фуксе Берлин.
Секогаш претпазливиот Роберто Гарсија Парондо во својата прва сезона на тренерското место на Вардар, успеа да стигне до насловот европски шампион.
Во текот на целата сезона Шпанецот беше скромен и не сакаше да создава еуфорија ниту по победите над фаворитите.
– Конечно можеме да кажеме дека сезоната заврши. Завршуваме со трофеј. Многу сме среќни. Никогаш не размислував за ваков епилог. Одиме натпревар по натпревар, чекор по чекор за на крајот да стигнеме на врвот. За тоа колку е голем и вреден овој успех, говори фактот дека сме зпред големи имиња како Веспрем, Барселона, ПСЖ, Пик Сегед, Киелце, ПСЖ,… – изјави Парондо.
Автобусот со вардаровата експедиција за пет минути ќе пристигне до плоштадот во ценатрот на Скопје каде се собрани неколку деседтици илјади фанови.
