Во НУ Музеј на македонската борба за самостојност денеска ќе се одржи мултимедијален настан „Државотворниот печат“.
Со манифестацијата во чест на Денот на независноста, 8 Септември, се одбележуваат 28 години од овој јубилеј и осум години работа на НУ Музеј на македонската борба за самостојност.
Пригодни обраќања до присутните ќе имаат директорката на музејот, Даниела Николова, и професорката Наталија Поповска. Во рамки на програмата ќе биде прикажан филм посветен на АСНОМ и македонската држава во повоениот период.
Специјален музички перформанс ќе има Ансамбл Македонија.
– Со овој настан се отвора посебна програма на изложби, промоции, трибини… со којашто НУ Музеј на македонската борба за самостојност во континуитет во текот на оваа и следната година ќе ги одбележува најзначајните датуми од македонската историја, особено оние поврзани со Втората светска војна и конечната победа над фашизмот – велат од Музејот.
