Загриженост на грчките политичари и производители особено од регионот на Солун, за судбината на производите произведени во нивната северна провинција со печатот „македонски”, доби ехо и во специјализираната француска ревија за виното „La Revue du vin de France“.
Грчките производители сметаат дека „ситуацијата не е јасна” со Преспанскиот договор за новото име на Северна Македонија, го пренесува пишувањето на ревијата дописникот на МИА.
Ова е посебно важно за виното, кое со етикетата „Македонико” (македонски на Грчки,) се извезува во повеќе земји во светот, објаснува за ревијата Јоргос Фунтулус, претседател на здружението на производители на вино во северна Грција. Тој си поставува прашање за иднината на „оваа географска ознака”. Тој потсетува дека во неговото здружение има 300 професионалци кои произведуваат четири милиони шишиња годишно или 48 различни етикети со ознака “Македонико” или “Македонија” (Македонија).
Покрај виното, во Грција има речиси 4.000 производи, од вина, алва, до млечни производи или зеленчук, што ги носат имињата „македонико”. Околу половина се извезуваат, додека само 10 отсто се „заштитена ознака“.
Сепак, грчкиот професор по меѓународни односи на Универзитетот во Оксфорд Антонис Цзанакопулос, вели дека трговските марки или знаци се секогаш регулирани со националниот закон или во случај на меѓународна употреба, според меѓународни конвенции.
На пример, „македонското вино” не е заштитен знак, туку е заштитена географска ознака што, како и заштитената ознака за потекло (ЗНП), се доделува според европскиот закон. Таа не подразбира земја, туку географски регион што го има само Грција, објаснува тој.
Во Република Северна Македонија загриженоста е помала отколку во Грција, смета француската ревија, бидејќи името Македонија или македонски веќе се користеше на меѓународно ниво со години.
Прашањето со користењето на термините се најде и на последниот Мешовит парламентарен комитет ЕУ-Северна Македонија во Стразбур, посебно истакнато од страна на Марија Спираки грчка европратеничка од редовите на ЕНП.
За грчката европратеничка од опозициската Нова Демократија, спроведувањето на Преспанската спогодба, поточно некои важни сегменти останаа нерешени, на прво место трговските марки и заштитените производи, за Грција ова е сива зона, при што се ќе зависи од билатералната комисија, а тоа ќе биде долг пат.
Поради овие причини таа и гласаше против препораката на МПК за почеток на преговорите на Северна Македонија, а зошто, тоа и го објаснува во изјавата за МИА.
– Јас гласав против предложените препораки за почеток на процесот на преговорите на Северна Македонија, ова поради последиците што може да ги има во Грција Договорот од Преспа. Крајно важно е да се појасни ситуацијата за македонските производи, бидејќи ние сме соочени со нелојална конкуренција во трговијата, посебно на меѓународен план, затоа ние не можеме да кажеме да за почеток на преговорите меѓу ЕУ и Северна Македонија – вели таа.
Покрај ова Спираки смета дека има преголем оптимизам за подготвеноста на Северна Македонија за почеток на преговорите со ЕУ.
– Секој што сака видливи резултати нема да го избере патот на избрзување – рече таа во расправата што се водеше во Стразбур.
Таа притоа потсети дека мнозинството од грчката јавност е против Договорот од Преспа, кој беше изгласан само од владеачкото мнозинство и пребегнатите пратеници од опозицијата. Поради ова, но пред се поради нерешената употреба на терминот „македонски“, таа гласаше против препораката за почеток на преговорите.
