Собранието го одобри барањето за притвор на пратеникот Никола Груевски, констатира претседателот на парламентот Талат Џафери откако со 62 гласа на мнозинството беше донесена одлуката за одземање на имунитетот на екс премиерот.
Во пленарната сала не присиствуваа опозициските пратеници на ВМРО-ДПМНЕ, а за барањето за притвор за Груевски немаше расправа.
Претпладне Комисијата за деловнички и мандатно имунитетски прашања со пет гласа „за“ ги усвои шесте барања од судот за одземање на имунитетот на Груевски, кој избега од Македонија и доби политички азил во Унгарија. На седницата не присуствуваше ниту еден пратеник од опозициската ВМРО-ДПМНЕ, чиј почесен претседател е Груевски.
Претседателот на Комисијата Павле Богоевски изрази разочарување што, како што кажа, нашиот систем не го обезбеди Груевски за издржување на двегодишната казна за случајот „Тенк“. Тој побара одговорност и завршување на истрагата за бегството на Груевски.
– И Комисијата и Собранието денеска постапуваат во една многу контрадикторна ситуација. Пред нас е поставена задача ние да одлучуваме за имунитетот на пратеник кој веќе е осудено лице кое е во бегство и кое е недостапно за органите на прогонот. Поради тоа, лично како пратеник, но и како човек морам да изразам разочарување што нашиот систем не успеа да го обезбеди присуството на осуденото лице Никола Груевски за издржување на неговата казна затвор. Врз основа на тоа сакам да потенцирам дека мора да се доврши и темелно да се спроведе истрагата за утврдување на одговорноста за тоа точно кој дел од системот потфрлил при обезбедувањето на присуството на Никола Груевски за издржување на неговата казна затвор. Исто така, морам да посочам дека ова искуство мора да послужи за лекција за да ги идентификуваме многу брзо, да ги корегираме системските недостатоци кои доведоа до оваа ситуација и оваа контрадикторност – рече Богоевски.
Тој смета дека уште поконтрадикторно е тоа што Груевски сѐ уште има мандат на пратеник. Богоевски кажа дека Груевски бил информиран за седницата и тоа по имејл и писмено преку пратеничката група на ВМРО-ДПМНЕ.
